Altsasuko alkate Javier Ollo Martinezek azaldu zuenez, Ospa Eguna “ edozein demokratak adierazpen-askatasunean eta biltzeko oinarrizko eskubidean kokatu behar du”. Alkateak gaineratu zuenez, deialdian “altsasuarren gehiengoak ez du parte hartzen”. Makina bat hedabidetako kazetariak etorri ziren Altsasura, batzuk kalez jantzitako poliziak eta Vox-en inguruko jendeak babestuta. Zenbait agerkariren jarduna ere salatu zuen Ollok: “Horrelako ‘komunikabideak’ dira demokraziarendako eta bizikidetzarendako benetako arriskua sortzen dutenak, gezurrak esanez eta berriro ere Altsasuren irudi irreala helaraziz, iritzi publikoa helburu politiko nabarmenekin amorrarazteko helburuarekin”.
Navarra Sumako bozeramaile eta UPNko presidente Javier Esparzak Ospa eguna dela eta “Estatuko Segurtasun Indar eta Kidegoen kontrako gorroto ekintza, irain eta laidoen aurrean higuin handia” agertu zuen. “Nafar guztien segurtasuna eta ordena zaintzen dutenez zigorgabetasun osoz barre egitea jasateaz nazkatuta gaude”, adierazi zuen. “Besteak iraintzen eta gutxiesten baino ez dakite, elkarbizitzarako oso eraikitzailea ez den jarrera”, gaineratu zuen Javier Esparzak.
Hala ere, Suma Nafarroako bozeramaileak argi utzi nahi izan zuenez, “zorionez, askoz gehiago gara horrelako jokabideak arbuiatzen ditugunak, eta lotsatuta eta haserre gaude Nafarroan horrelakorik gertatu delako”.
Esparzak salatu duenez, “ziurrenik, alderdi batzuek eskuak burura eramango dituzte gertaeren aurrean, eta gertatutakoa gaitzesten dutela esango dute. Baina alderdi horiek ez daude horrelako ekintza onartezinak antolatzen dituztenekin hausteko prest, horrek euren babesari esker betetzen dituzten besaulkiak galtzea ekarriko lukeelako”.
Azkenik, Javier Esparzak Nafarroako gizartea gogoratu nahi izan du. “Guardia Zibila eta Polizia Nazionala Nafarroatik ateratzea eskatzen duen gutxiengoa barne, herritar guztiei eman dizkieten zerbitzu kontaezinak, guztien segurtasuna eta eskubideak berdin defendatuz”. Koalizioak besarkada handi bat bidali nahi die Nafarroan lan egiten duten bi kidegoetako kideei, baita Foruzaingokoei eta haien familiei ere, eta eskerrak eman nahi dizkie gure lurrarekin egindako lanagatik eta hartutako konpromisoagatik.
PSNk gaitzespena adierazi zuen “atzean geratu ziren gorroto garaiak berpizten dituzten gertakari batzuengatik; izan ere, gutxi batzuk, arrakastarik gabe, Foru Erkidegoaren irudia zikintzen saiatzen ari dira”. Sozialistek Ospa Eguna “gogor salatu” zuten, “Nafarroan ezarritako elkarbizitza, bakea eta errespetua pitzatu nahi dituztelako”. Bestetik, “herritarrak zaintzen dituzten segurtasun indar guztiekin duten konpromiso argi eta irmoa” berretsi zuten sozialista nafarrek. Guardia Civilari, Polizia Nazionalari, Foruzaingoari eta udaltzain guztiei babesa adierazi zieten, baita haien familiei ere. Azkenik, sozialistek Nafarroako Gobernuari eskatu zioten “eutsi diezaiola bizikidetzan oinarritutako kudeaketaren defentsa zorrotzari, gure lurraren aniztasuna eta aniztasuna sustatzeari, guztion errespetuari eta elkar ulertzeari eta memoria demokratikoari, askatasunean aurrera egiten jarraitzeko”.
Bestetik, Asociacion Unificada de Guardias Civilesek (AUGC) Ospa Eguna “guardia civilei eta haien familiei mespretxu eta mehatxu ekitaldi” gisa definitu zuen. “Duela hamarkada bat Nafarroako eta Euskal Herriko hainbat herritan ospatzen ari den jardunaldi honekin, erradikalek Estatuko Segurtasun Indar eta Kidegoak Nafarroatik eta Euskaditik kanporatzea aldarrikatzen dute”. AUGCk gogora ekarri zuen Altsasun “bi agentek eta haien bikotekideek eraso bat jasan zutela 2016ko lastailean”.
Guardia civilen elkarteko kideen iritziz, “guztiz onartezina da garai honetan, terrorismoak hainbat hamarkadatan kolpatu ondoren erradikalek guardia civilak behin eta berriz seinalatzen jarraitzea”. Aldi berean, ETAk 200 agente baino gehiago hil zituela gogorarazi zuten elkartetik. AUGCkoen iritziz, Ospa Eguna “langile batzuek lurralde horretan egunero jasaten duten isolamenduaren eta jazarpenaren beste adibide bat da. Langile horien lana herritar guztien segurtasuna bermatzea da, baita elkarbizitzarako legeak betetzea ere”.
Horregatik, AUGCk “Guardia Civilaren eta haren kideen inguruan gorrotoa sortzen duten horrelako ekintzak eta kanpainak debekatzea” eskatu du, gaineratuz, agenteen senideengan ere eragiten duela, “horietako asko adingabeak baitira”. Azkenik, Nafarroako Gobernuari Ospa Eguna “zalantzarik gabe gaitzestea” eskatu zioten.
