Arabako Lautadako aldiriko tren zerbitzuaren erabiltzaileek harpidetza sistema berri batean izena emateko aukera dute abenduaren 1az geroztik. Sistema horren bidez, zuzenean jaso dezakete telefono mugikorrean beren trenen zirkulazio egoerari buruzko informazio pertsonalizatua, telefonora bidaliko zaizkien WhatsAppeko mezuen bidez. Neurri horrekin Eusko Jaurlaritzako Mugikortasun Jasangarriaren Sailak erabiltzaileen esperientzia hobetu nahi du.
Kanal berriak berehala, eroso eta doan eskaintzen du trenen zirkulazioaren egoera ezagutzeko informazioa, betiere erabiltzaileari ordutegi-tartearen arabera gehien interesatzen zaizkion trenak kontuan izanik. Horri esker, abisuak pertsonaliza daitezke, pertsona bakoitzaren interesen eta beharren arabera.
Harpidetu beharra
WhatsApp bidezko abisu sistema horren funtzionamendua erraza eta intuitiboa da. Erabiltzaileek Renferen webgunearen bidez harpidetu ahal izango dute, eta bertan sartu beharko dute WhatsAppeko mezuak zer telefono zenbakitan jaso nahi dituzten. Webgunean erregistratutako bidaiariak direnean, sistemak berak ezagutuko du haien kontuaren telefono zenbakia. Gainerako bidaiarien kasuan, telefono zenbakia egiaztatu beharko dute, SMS bidez jasoko duten egiaztapen kodea erabilita. Lehen urrats horren ondoren, harpidetzen atalean sartu beharko dute, eta bertan aukeratu ahal izango dute unean-unean zer zerbitzuren informazioa lortu nahi duten. Zer linearen, zer asteko egunen eta zer ordutegiren informazioa nahi duten aukeratu ahal izango dute.
Harpidetza egin ondoren, erabiltzaileek aukeratutako zerbitzuen jakinarazpenak jasoko dituzte beren WhatsAppean, aukeratutako egun eta tarteetan. Bidaiariek jakinarazpenak aktibatu edo desaktibatu ahal izango dituzte, beren lehentasunen arabera, eta edozein unetan baja eman ahal izango dute abisu-zerbitzuan. Zerbitzu berriak ez du kosturik erabiltzaileendako, eta lehendik dauden informazio-kanalei batzen zaie, bidaiariekin zuzenean komunikatzeko sistema indartuta.
Zerbitzuaz
Miranda de Ebro eta Altsasu arteko tren zerbitzua aipatu Eusko Jaurlaritzako Mugikortasun Jasangarriaren Sailak kudeatzen du ilbeltzaz geroztik, eta maiatzaren 30an jarri zen martxan. Astero 140 tren inguru ibiltzen dira bi herrien artean eta %30era arteko tarifa merkeagoak lor daitezke bidaia txarteletan. Zerbitzu berria martxan izan den lehen sei hilabeteetan, garagarrila eta azaroa bitartean, bidaiari kopurua joan den urtean garai berean baino %45 handiagoa da. Guztira 141.111 bidaiari eraman ditu.
