Final estua espero zen Nafarroa Arenan. Dirua ere, parez pare zegoen hasieran. "Parera atera da dirua, pare-parean" berresten zuen apustuak bata bestearen atzetik lotzen ari zen zazpi artekarietako batek. Giroa ere, aparta. Ohiko pilotazaleez gain, pilotari bakoitzaren kuadrillak eta gertukoak bildu dira Nafarroa Arenan, giro ederrean. Pankarta asko eskegi zituzten, bataren eta bestearen aldekoak. Ezkurdiak eta Rezustak finala batera ospatuko dutela erabaki zuten, eta bi pilotarien zaleek zapi gorri berdina zeramaten. Zapi gorri asko ikus zitezkeen pilotazaleen artean.
Aurretik final osoan
Hasieratik aldea atera zuten gorriek eta partida guztian aurretik egon ziren. Urdinek zenbait akats pilatu zituzten, urduri antza aritu ziren eta ia konturatu gabe 7-1 aurreratu ziren Ezkurdia eta Rezusta. Atzelari bergararrak ongi eutsi zien urdinei. 7-3 hurbildu ziren urdinak Mariezkurrenak pilota errebotera bidali eta Rezustak erantzun ezin izan zuenean, baina hurrengo tantoa Ezkurdiaren dejada zoragarri bat izan zen (8-3). Partidak puri-purian jarraitu zuen eta 9-5 gerturatu ziren urdinak, eurendako oso garrantzitsua izan zen tantoan, Tanto oso luze eta gogorrak jokatu ziren tarte horretan. Ezkurdiaren pilota batek marra ukitu zuela kexatu ziren urdinak eta txistuak entzun ziren, baina epaileek argi zuten gorrien tantoa izan zela (10-6). Partida gogortzen ari zen, erabat, eta 10-8 hurbildu ziren urdinak. Baina hurrengo tanto gogorrean, Rezustak urdinen bonbardaketari sendo eutsi zionean, Mariezkurrenak kanpora bidali zuen pilota eta lehen atsedenaldi ofizialera iritsi ziren, Ezkurdia eta Rezusta 12-8 aurreratuta zirela. 34 minutuko jokoan 293 pilotakada gurutzatu zituen laukoteak.
Atsedenaldiaren ondoren urdinen erauntsiak jarraitu zuen. Tanto oso gogorrean, Rezustak denetariko pilotakadak erantzun behar izan zituen. Mariezkurrenaren pilotakadak marran jo zuen (13-8). marrara. 14-8a tanto ikusgarria izan zen, Ezkurdiak modu ezin hobean gurutzatutako tantoa, asko balio zuena. 14-10ekoan egin zuen Rezustak partidako lehen akatsa. Izan ere, ikusgarri aritu zen atzelari ezker bergararra. Segidan airea hartu zuten urdinek, eta 14-12 gerturatu ziren. Ezkurdiak eta Rezustak defentsa ikaragarria erakutsi zuten hurrengo tantoan, eta Mariezkurrenarenari kanpora joan zitzaion (15-12). Segidan 17-13 aurreratu ziren gorriak, urdinen akatsak tarteko. Oso sendo jokatu zuten Aspeko beteranoek, ofizioa eta fidagarritasuna erakutsiz. Artolaren dejada bati esker 17-13 jarri ziren urdinak, eta Ezkurdiak bigarren botean iritsitako pilotagatik 17-14 gerturatu ziren eta gorriek euren bigarren atsedena eskatu zuten. Itzuleran berriro bi tantora jarri ziren Artola eta Mariezkurrena, errebotera bidalitako pilota Rezustak ezin izan baitzuen erantzun, baina hurrengo tantoan Artolaren pilotakadak txapan jo zuen eta 18-15, bigarren atsedenaldi ofiziala iritsi zen. Ordura arte, 514 pilotakada jo zituzten lau pilotariek.
Azken tantoen eromena
Bukaerara arte emozioa izan zuen partidak. Tanto oso luze eta gogorrak jokatu ziren, eta defentsan lan ikusgarria egin zuten gorriek. 19-15 aurreratu ziren, tanto oso garrantzitsua eurendako, baina Rezustaren akats batengatik eta Ezkurdiak erantzun ezin izan zuen tanto batengatik atzera ere bi tantora jarri ziren urdinak, 19-17. Ezkurdiak eskuinera zabaldutako tanto eder bati esker 20-17 jarri ziren gorriak, eta 21-17 berehalakoan. Gorrien azken sakeko tantoan, Ezkurdiak ezin izan zuen zabalera botatako tantoa erantzun, eta 21-18 gerturatu ziren Baikokoak. Urdinek ez zuten etsi, eta 21-20 gerturatu ziren. "Jo eta ke, irabazi arte" kantatzen zuten euren zaleek, itxaropena galdu gabe. Ordurako lau pilotariak jota zeuden, eta Ezkurdia une batean aldageletara atera behar izan zen, kalanbreak zirela medio. Urduritasuna zen nagusi Nafarroa Arenan, emozioak azken unera arte iraun zuelako. Baina gorriek zuten guztia eman, eta 22-20 irabazita, merezitako garaipena lortu zuten Aspekoek.
Txapelaz gain, Joseba Ezkurdiak txapelketako pilotari onenaren EITB Saria jaso zuen. Finalean ere, nahiz eta fisikoki joata bukatu, Ezkurdiak ezarri zuen aldea, hasieran bereziki.
Artola-Mariezkurrena, penatuta
Hasieran lortutako aldea ongi kudeatzeari esker, egindako defentsa ikaragarriarengatik eta duten erregulartasun eta fidagarritasunagatik irabazi zuten txapela Ezkurdiak eta Rezustak, bakoitzaren hirugarrena, guztiz merezitakoa. Akats gehiago egin zituzten Artolak eta Mariezkurrenak, eta horrek ere kondenatu zituen. "Partida hasieratik atzetik egotea tokatu zaigu, eta horrek, azkenean, pisu handia izan du guretako, uneoro korrontearen kontra aritu garelako eta horrek neke handia sortzen duelako. Oso zaila da buelta ematea. Final eder bat izan da, pena txapela hain gertu edukita lortu ez izana" azaldu zuen Artolak. Mariezkurrenak "gorputzaldi txarra" geratu zitzaiola aitortu zuen. "Pena handia dut galtzeagatik. Ez ditut sentsazio oso onak. Ez dut nahi nuen bezalako partida egin. Bukaerara arte borrokatu dugu, baina huts dezente egin ditut, eta hori izan da, baita ere, finala galtzearen gakoetako bat". Txapeldunak zoriondu zituzten. "Goza dezatela, eta ikusiko gara beste batean".
Ezkurdia eta Rezusta, hunkituta
Ezkurdia eta Rezustak "jodidos pero contentos. Hala esaten da, ez?" zeudela aitortu zuten. Leher eginak iritsi ziren prentsaurrekora. "Partidak ongi hastea oso garrantzitsua dela, eta erritmoa jarriz aurretik hasi gara, eta gero errenta horri eustea lortu dugu. Uste dut pazientzia izan dugula" zioen Ezkurdiak. Rezusta kontziente zen Baikokoek jokoa atzean kargatuko zutela. "Momentu batzuetan sufritu dut, piloteoan baino zenbait sake erantzuterako unean, baina garrantzitsua izan da halakoak moztu, beste takadatxo bat egin, eta hasieran lortutako errenta mantentzen joatea. Sufrituta heldu gara 22ra" onartu zuen Bergarakoak.
Partida luzatu eta gogortzeko ez zuten beldurrik. "Irabaztea zen helburua, azken tanto hori nola edo ahala egitea" gaineratu zuen Ezkurdiak.
Txapelak gertukoendako zirela nabarmendu zuten. "Etxekoendako, gertukoendako, neskalagunarendako, lagunak, entrenatzen laguntzen diguten lagunak, Jokin Etxaniz..." azaldu zuen Rezustak. Ezkurdiak horiek guztiez gain, "inguruko guztiak, ezkutuan laguntzen gaituztenak", eta bereziki aita eta ama aipatu zituen, "beraiek direlako benetako txapeldunak". Hunkituta zegoen arbizuarra. "Urte oso txarra daramagu etxean, eta finalaren tentsioa bukatuta guztia etorri zait burura eta hautsi egin naiz" aitortu zuen.
Ezkurdia-Rezustaren ospakizuna, Arbizun
Arbizuko plazan ongietorri jendetsu eta animatua egin zieten arbizuarrek eta gipuzkoarrek txapeldunei. Besarkadak, lore sortak, suziriak, aurreskua, bertsoa eta lagunen kantuak, bonboa eta tronpeta lagun, ez ziren falta izan. Segidan, Olatzea hotelean bildu ziren finala ospatzera. 146 lagun zeuden afarirako izena emanda, eta parrandak luze jo zuen.
