Lurralde Kohesiorako Departamentuak, Nilsa Tokiko Azpiegituren Nafarroako sozietate publikoaren bitartez, Dorraon araztegia egiteko lanak eman ditu. Obra Construcciones Valeriano Santesteban S.L. enpresari eman dio Nafarroako Gobernuak 400.000 euroren truke. Inbertsioa Nilsak kudeatzen duen saneamendu-kanonarekin finantzatuko da oso-osorik, Nafarroako herritarren uraren ordainagirien bidez. Foru administrazioak jakinarazi duenez, uda akaberan hasiko dira lanak eta enpresak sei hilabete izanen ditu haiek despeditzeko.
Nilsak araztegi oso bat diseinatu du, Dorraoren berezitasunetara egokitzeko gaitasuna duena. Kontzejuan erroldatutako 114 biztanleei eta artisau-gaztandegi txiki bati zerbitzua emateko. Etxeko urak ez diren beste osagai espezifiko batzuk daudenez, zaharkituta dago gaur egungo arazketa-sistema, hobi septiko bat. Izan ere, gaur egun Dorraon Imhoff tanke bat dago, Leziza ibaiaren eskuinaldean, herritik 190 metrora, hondakin-uretarako. Funtzio bikoitza dauka hobi septiko horrek, ur zikinen harrera egin eta prozesatu. Tanke horretara, isurbide bat iristen da ekialdetik, biztanleriaren isurketa gehiena jasotzen duena, eta beste bat mendebaldetik datorrena, hainbat etxebizitzatako urak biltzen dituena.
Araztegi proiektuaren irudikapena.
Instalazio berriaren ezaugarriak
Instalazio berria segundoko 0,47 litroko eguneko batez besteko emaria tratatzeko diseinatuta dago (40 metro kubiko egunean), eta instalazioan segundoko 3,28 litroko gehieneko onargarria da. Nabarmentzekoa da uholde handiak, euri-jasak edo ekaitzak gertatzen diren uneetarako segundoko 1,13 litrokoa dela aurreikuspena, etorkizuneko azpiegiturak onar dezakeen gehieneko emaria baino nabarmen txikiagoa.
Araztegi berria egungo tankea dagoen partzela berean kokatuko da, eta bigarren mailako dekantagailu bihurtuko da. Instalazioa iragazki biologikoetan oinarrituko da, duela ia 30 urtetik Nilsan erabiltzen den ohiko sisteman, bere eraginkortasunagatik eta egonkortasunagatik. Uraren ibilbidea bukaerako bi hezeguneetan bukatuko da. Aintzira horiek arazketan indartze-etapa gisa jarduten dute, eta larrialdietan ura atxikitzeko putzu gisa ere balio dute. Dauden bi hustubideak kontserbazio-egoera onean daude, eta aldaketa txikiren batekin erabiltzen jarraituko dira obra berrian sartzeko.
Gainera, telekontrol sistema bat izanen da. Horrela, urrutitik gainbegiratu ahal izango da, NIilsaren bulegoetatik edo Internet bidez, edozein matxura edo larrialdiren berri jakiteko. Gehienez ere 24 orduko epean erantzunen zaie gertakari horiei. Bestalde, mantentze lanetako teknikariek astean bitan bisitatuko dute instalazioa, auto-ilarak eta lohi-mailak ikuskatzeko, egoera orokorra ikuskatzeko, hondakinak eta zaborra kentzeko eta lorezaintza lanak egiteko. Instalaziotik kendutako lohiak araztegi handiago batean tratatuko dira, tamaina txikiko instalazio guztietan gertatzen den bezala, sortzen duten bolumen txikia dela eta.
