Saihesbidea egiteko lanak eman dituzte

Herriaren eta industrialdearen artetik joanen da saihesbidea, ezkerretik.

Herri Lanen Departamentuak 1,1 milioi eurotan esleitu du Irurtzungo saihesbide berria, herri erdiguneko trafikoa arintzeko eta bide segurtasuna hobetzeko. Lanak azaroan hasiko dira eta 9 hilabete iraunen dute.

Lurralde Kohesiorako Departamentuak, Herri lanen eta Azpiegituren Zuzendaritza Nagusiaren bitartez, 1.124.594,98 eurotan eman ditu Irurtzungo saihesbide berriaren obrak. Azaroan hasiko diren lanak, Construcciones Boreste SA enpresak eginen ditu. Horretarako 9 hilabete izanen ditu. Irurtzun sarreran, Asterainerako errepidean, Lizarra kalearen ezkerraldean saihesbide bat egitean datza lana. Industrialdea zeharkatzen duen NA-2410 errepidean bukatuko da saihesbidea. 

Bideak 300 metroko luzera izanen du, gutxi gorabehera, eta 7 metroko galtzada izango du, bi erreirekin, noranzko bakoitzeko bat; horretaz aparte, 2 metroko espaloia izango du herriaren ondoko aldean. Bi konexioak egiteko, biribilgune bana eraikiko da. 

Irurtzungo zeharbideak zirkulazio dentsitate handia du, A-15 eta A-10 autobien bidegurutzean kokagune estrategikoa duelako, Nafarroa Gipuzkoarekin eta Arabarekin lotzeko. Ibilgailu astunen kopuru handi bat industrialdetik eta Asteraingo errepidearen bidez egindako harrobien eremutik dator, eta hirigunean N-240-A errepidearekin bat egiten dute. Herri lan eta Azpiegituren Zuzendaritza Nagusiak jasotako 2020ko edukiera datuen arabera, 1.400 ibilgailu baino gehiago ibiltzen dira egunero Asterainetik Irurtzunera doan errepidean, NA-7010 errepidean, eta 2.331 ibilgailu igarotzen dira egunero N-240-A errepidetik.

Erlazionatuak

Saihesbidea eta autobiako irteera lotuta

Irurtzun

Lizarra eta Aralar kaleak lotuko dituen errepide berriak trafikoa eta segurtasuna handituko ditu heldu den urtean. 2022an, berriz, Izurdiagako saih...
Saihesbideko aurrekontua 100.000 euro igo da

Irurtzun

Nafarroako Gobernuaren asmoa zen aurten saihesbidea egitea eta heldu den urtean autobiarekin lotura egitea, industrialdeko kamioiek Iruñerri...