Joxe Mari Agirre harakinak saria jaso du Bilbon

Otsailaren 15ean Bilboko Academia del Cerdo Txarriduna elkarteak Etxeko Txorizo Onenaren 11. Villa de Bilbao lehiaketa antolatu zuen. Urtero inauterien harira antolatzen da lehiaketa hau, eta bertara gordin jateko txorizoak aurkezten dira. Guztira 99 harategitako horrenbeste txorizo aurkeztu ziren: Bizkaitik 39, Gipuzkoatik 33, Arabatik 11, Kantabriatik 9, Errioxatik 4 eta Nafarroatik 3, hirurak sakandarrak. Hain zuzen ere Lakuntzako Agirre harategiak, Altsasuko Aldasoro harategiak eta Irurtzungo harategi batek aurkeztu zuten bere produktua. Gastronomian adituak diren 6 kidek osatu zuten epaimahaia, eta erabaki zuten gordinik jateko txorizo onena Castro Urdialeseko Guillermo Ruizek egin zuela. Bigarren saria, aldiz, Lakuntzara etorri zen, Joxe Mari Agirrek prestatutako txorizoa bigarren finalista izendatu baitzuten. "Lehiaketa honetara aurkezten naizen lehenengo aldia da. Hestekiak betetzeko hestea Bilbotik bidaltzen didate eta Bilboko lehiaketa horretara aurkeztera animatu ninduten bertatik. Ez zen Bilbora joan behar txorizoa eramatera, beraiek arduratzen ziren produktua jasotzeaz, eta azkenean aurkeztera animatu nintzen. 99tik bigarrena naizela jakiteak asko poztu nau" dio Joxe Mari Agirrek, jaso duen diploma alboan duela. Txorizoa eta txistorraIzatez etxarriarra den Agirrek bizitza guztia darama harakin, 41 urte jadanik. Txorizoa baino gehiago hemen txistorra jaten dela dio, baina biak ditu gustuko. "Bakoitza bere momentuan jateko da aproposa" dio. Txistorra eta txorizoa egiterakoan dauden ezberdintasunez galdetuta Agirrek esaten du txorizoa egiteko erabiltzen den haragi guztia txerrikia dela, giharra eta hirugiharra bereziki, eta haragia ez dela txistorrarako bezainbat txikitzen. Gero piperra, baratxuria... eta norberaren eskola edo gustuko osagaiak gehitzen omen zaizkio. Txistorra egiteko, aldiz, giharraz gain urdaia eta gizen gehiago erabiltzen omen da. "Nolanahi ere bi produktuak egiteko haragi ona behar duzu" gaineratzen du harakinak. Txistorra, normalean, fresko dagoela hasten da saltzen, egin eta 8-10 egunera. Aldiz, txorizoa 25 egun ingurutan egon behar omen da lehortzen. "Bilbora aurkeztu nuen txorizoa freskoegia zegoen, 14 egun zeramatzan lehortzen. Denbora gehiago balu bere puntu onena hartuko zukeen" dio. Egunean bertan saldu omen zuen egindako txorizo partida. "Beti modu berean egiten ditut txistorrak edo txorizoak, baina lehiaketa batetarako aurkeztu beharrekoak akaso mimo gehiagorekin egiten dituzu" gaineratzen du harakinak, irribarrez. Sarien garrantziaJoxe Mari Agirre 2003an Sakanako XII. Txistorra Lehiaketako txapelduna izan zen. Sari hauek eragina dutela dio, salmentan asko nabaritzen dela. "Hasieran kosta egin zitzaidan lehiaketetara aurkeztea, baina sariren bat baduzu salmentak gora doaz, jendeak gauza horiei kasu egiten die. Hemendik Gipuzkoako eta hiriburuetako jende asko pasatzen da, eta txistorra eta txorizo asko ematen dute". Ildo horretan, Sakanako Txistorra Lehiaketa desagertu izana penagarria da harakinarendako. "Lehiaketa faltan sumatzen dugu, beharrezkoa litzateke berriz txistorra eta baita txorizo lehiaketa ere antolatzea. Baina txistorraren kofradia separatu zen, antolatzaileek utzi zuten... akaso harakinek bultzatu beharko genuke hori, baina pena da Altsasuko Ferietan txistorra lehiaketa ez egotea" dio. Sakana txistorran espezializatua ote dagoen galdetuta, Agirreren iritziz toki guztietan egiten da txistorra, baina Sakanan asko egin eta asko saltzen da.