Udako oporren ondoren Sakanan egindako kontratu kopurua %34,91 hazi da eta horrek, neurri batean, eragina izan du langabeziaren jaitsieran. Langabezi zerrenda utzi duten 71etatik bakarra emakumezkoa da, gainontzekoak, gizonezkoak. Azken horiek ibarreko langabeen %43,93 dira (680). Lan bila izena emana duten emakumezkoak %56,07 dira (868).
Adinari dagokionez, langabetuen %46,71 (723, aurreko hilean baino 12 gutxiago) 45 urte edo gehiago ditu. 25 eta 44 urte artekoen adin multzoa da langabe gehien duen hurrengo adin tartea, %42,51 (658, 63 gutxiago). Azkenik, 25 urtez azpikoen taldea dago, %10,79 (167, 4 gehiago). Sakanan Nafarroako langabeziaren %3,35 genuen irailean (herrialdearen %3,22 populazioa gara).
Sektoreak
Zerbitzuen arloan pilatzen dira sakandar gehienen lan eskaerak %57,82 (895, 15 gutxiago). Industrian aritzeko eskaerak %27,13 dira (420, 59 gutxiago). Eraikuntzan lan egiteko prest daudenen eskaerak %6,33 dira (98, 11 gutxiago). Lehen sektorerako eskaera kopurua %2,33 da (36, 7 gehiago). Azkenik, aurretik lanik egin ez duten sakandarrak %6,4 dira (99, 7 gehiago).
Kontratuak
Irailean 535 kontratu sinatu ziren Sakanan. Haietatik %50,47 (270) gizonezkoen sinadura zuten. Gainontzeko %49,53 (265) emakumezkoek sinatu zuten. Sinatutako kontratuen %1,5 (8) besterik ez ziren hasieratik mugagabeak. Hilean zehar mugagabe bihurtutako kontratu kopurua %2,24 (12) izan ziren. Aldi baterako sinatutako kontratuak, berriz, %96,26 (515) izan ziren. Nafarroan irailean sinatu ziren
22.566 kontratuetatik Sakanan sinatutakoak %2,37 dira.
Langabezia herrika
Herria Langabetuak Aldea
Arakil 49 4
Irurtzun 164 -3
Irañeta 4 -2
Uharte Arakil 47 -11
Arruazu 2 -1
Lakuntza 70 1
Arbizu 70 2
Ergoiena 11 -6
Etxarri Aranatz 151 -5
Bakaiku 17 2
Iturmendi 21 2
Urdiain 29 -2
Altsasu 762 -48
Olatzagutia 125 -1
Ziordia 26 -3
Sakana 1.548 -71
Iraila akaberan agorrilarekin 71 pertsona gutxiago zeuden enplegu bulegoetan izena emanda, hau da, 1.548. Garilean 1538 ziren.