Kontsumo arduratsuaren ideian oinarrituta, Nafarroako hegoaldeko 15 nekazarien kalitatezko produktuekin kutxak osatu eta zuzenean saltzen ditu Errigorak. Kutxa bakoitzak 50 euro balio ditu eta kutxa bakoitzaren %25 Nafarroako hegoaldeko euskalgintzari bideratzen zaio. Hori horrela da kutxak osatu eta banatzeko auzolan erraldoia egiten dutelako Zazpiak Bat harreman sareak, Sortzenek, AEKk, Ikastolen Elkarteak eta Errigorak. Denen artean egia bihurtzen dute kanpainaren leloa: Nafar hegoaldeko uzta, euskarari puzka.
Joan den urtean Euskal Herriko 200 herritan izan ziren Errigorako banaketa puntuak eta 12.000 kutxa salduz 160.000 euro lortu ziren. Sakanan ere oihartzuna izan zuen kanpainak 412 eskaera egin baitziren. Laugarren urtez, prest daude eskaera puntuak. Azaroaren 8ra arte egin daitezke eskaerak bai Sakanako 20 tokitan bai www.errigora.eus bidez. Saskiak jaso eta ordaintzea azaroko azken bi asteetan eginen da.
Eskaera puntuak
Herria Tokia
Irurtzun Pikuxar
Irañeta Elkartea
Uharte Arakil Anaiak taberna
Mendikoa Kafetegia
Arruazu Ostatua
Lakuntza Aliprox
Tania arraindegia
Bittori
Arbizu Karrika taberna
Etxarri Aranatz Udaletxeko estalopean
Kaxeta Liburu-denda
Portuko Okindegia
Andra Mari Ikastola
Bakaiku Elkartea
Iturmendi Aizkozar Elkartea
Altsasu Itsasi euskaltegia, AEK
Biltoki Taberna
Portuko Okindegia
Iñigo Aritza Ikastola
Olatzagutia Barandi taberna
Hiru proiektutara bideratuko da dirua
- Lodosako Ibaialde eta Vianako Erentzun ikastolak bizirik irauteko ezinbesteko duten elkartasun ekonomikoa indartzea.
- Erriberako AEKren ekonomia egoera arintzea, beka fondoa handitzea eta zabaltzea eta sustapen kanpaina garatzea.
- D eredua Nafarroa osora zabaltzea bilatzen duten ekimenetara bideratuko du Sortzenek.
Kutxan zer?
Ardo beltz botila, litro erdiko oliba olio birjina estra botila, melokotoia almibarrean, orburuak, potxak, karduak, mahats zukua, almendrak, pikillo piper ontzi txikia, pikillo piper ontzi handia, zainzuriak, melokotoi marmelada eta pikillo piper untapana.
Eskutik eskura
Izen hori du Errigorak otsailean eta maiatzean sustatzen dituen kanpainak. Aurrenekoan olioa, bigarrenean kontserbak eskuratu daitezke, ekoizleen jatorrizko prezioan.