Sakanako sortzaileei plaza eskaintzeko asmoz sortutako Agertokiye programazioaren barruan, bihar Zoila Berastegi Mariñelarenaren txanda izanen da. Arbizuarrak idatzi eta Iruñeko Udalaren haurrendako antzerki testuen lehiaketa irabazi zuen Pluton: hor konpon marianton! antzezlanarekin gozatzeko aukera izanen dute txikiek.
Kultur talka bat eta ingurumena dira antzezlaneko gaiak. Ama lurraren natura-baliabideak etengabe ustiatzen direla eta haiek agortzen ari direla ikusirik, Xerafin eta Katixa astronautei beste planeta batzuetan ura bilatzeko beharra jarri diete. Bilaketa misioan hainbat abentura biziko dituzte protagonistek.