Elizak ondasunak bere izenean erregistratzea

Gobernuaren zerrenda elizak 7 ondasun gutxiago ditu inmatrikulatuak

Aizkorbeko eliza.

Espainiako Gobernuak zabaldutako zerrendan Iruñeko elizbarrutiak bere edo herrietako parrokien izenean jarritako 59 daude; Nafarroako Ondarearen Aldeko Plataformaren zerrendan 66 dira.

Eliza Katolikoak 1998an Jose Maria Aznarrek bultzatutako lege bati esker 34.961 ondasun higiezin inmatrikulatu zituen. Hau da, hipoteka-araudiak elizari gurtzarako edo ez gurtzarako ziren ondasun higiezinak bere izenean jartzeko aukera eman zion. Eta hala egin zuen. Horrela jaso du Ministroen Kontseiluak Espainiako Kongresari bidali dion agiriak. Orain inmatrikulazio horien jatorria kontsultatu daiteke eta, titulartasunari buruzko gatazkarik balego, posible litzateke ondasunen erreklamazioa egitea. 

Aipatu agirian Sakanako 59 ondasun elizaren izenean daude, guztiak dagokion herriko parrokiaren izenean erregistratuta Iruñeko 8 zenbakidun erregistroan. Salbuespena Uharte Arakilgo Zamartze ermita eta aldameneko bi etxebizitzak dira, horiek Iruñeko elizbarrutiaren izenean erregistratuta baitaude. Elizak ibarrean erregistratutako ondasunen motari dagokionez, 29 ermitak dira, 27 elizak, 2 etxebizitza eta lursail bat. Arakil aldean estimu handia dioten eta Itzako Aginaga herriko lurretan dagoen Ergako Trinitate ermita Iruñeko Elizbarrutiarena da, Iruñeko 3 zenbakidun erregistroan hala jasoa. Urdiainek eta Altsasuk San Pedro ermita partekatzen dute, baina elizak haren jabetza Urdiaingo parrokiaren izenean jarri zuen. 

Zazpi gehiago 
Nafarroako Ondarearen Aldeko Plataforma herritarrek eta udalek osatzen dute eta “herriek beraien ondarearen jabetza berreskuratzeko lan” egiten du. 2008. urtean Nafarroan elizak inmatrikulatutako ondasunen zerrenda argitaratu zuen eta han ibarreko 66 ondasun ageri ziren, Espainiako Gobernuaren zerrendan baino zazpi gehiago. Plataformaren zerrendan agertu baina asteartean publiko egin zen zerrendan ez dauden ondasunak honakoak dira: Aizkorbeko Kaskalluko larrea, Etxeberriko eliza eta Uharte Arakilgo Zamartzaldeko bost lur sail. 

Aipatutako bi zerrendetan Sakanako beste 17 erlijio eraikinen aipamenik ez da egiten: Egiarretako Itxasperriko Santiago ermita, Ekaiko San Lorenzo ermita, Satrustegiko San Esteban eta Santa Barbara ermitak, Hiriberri Arakilgo San Anton eta Berastegiko Andra Mari ermitak, Ihabarko San Joan ermita, Irañetako San Gregorio ermita, Uharte Arakilgo Aralarko santutegia, Etxarri Aranazko Andra Mari eta San Adrian ermitak, Bakaiku eta Iturmendiren Trinitate ermita eta Altsasuko San Joan eta Erkudengo Ama ermitak. Gainera, Atondoko Oskiako Andra Mari ermita ere ez da zerrendetan ageri. 

Erreklamazioa 
Elizak bere izenean jarritako ondasunen bat beretako erreklamatu nahi duen pertsonak edo erakundeak epaitegietara jo beharko du. Eta erreklamaziorik ez badago ontzat jotzen da elizaren jabetza. Hala aurreikusi du Espainiako Gobernuak. Nafarroako Ondarearen Aldeko Plataformako kideak ez daude erabaki horrekin ados eta lege edo dekretu bidezko konponbidea eskatu dute, epaitegietara joan beharrik ez izateko. Gainera, herri txikiek epaiketara jotzeko gaitasuna ote duten ikusteko dagoela esan dute plataformatik, prozesuak urtetan luzatzen baitira. Nafarroako Parlamentuak Nafarroako Gobernuari eskatu zion erregistroetako oharrak eskuratzeko 2019an, eta horretan dabil foru administrazioa. Agiri horiek “era desegokian inmatrikulatutako ondasunak berreskuratzen” lagunduko dutela uste dute plataformatik. 

Epaitegian bukatu zuena Irañetako Udala izan zen. Herri sarreran dagoen San Gregorio ermita bere izenean jarri zuen udalak 2009ko otsailaren 18an. Hori jakin zuenean, Irañetako parrokiak auzitegira eraman zuen jabetzaren gaia. Eta epaileak elizaren alde egin zuen 2012an. 

Elizak Sakanan inmatrikulatutako ondasunen zerrenda
Udalerria Kontzejua Eraikina
Altsasu   Jasokundearen eliza
    Otadiko Kristo Deuna ermita
Arakil Aizkorbe San Andres eliza
  Ekai San Andres eliza
  Etxarren San Bizente eliza
  Egiarreta San Antonio Abadea eliza
  Errotz San Babil
  Izurdiaga San Joan Bataiatzailea eliza
    Lursaila San Joan kalean  z/g
  Satrustegi San Migel eliza
  Urritzola San Pedro eliza
  Hiriberri Arakil San Martin eliza
  Ihabar San Esteban eliza
  Zuhatzu San Martin eliza
Arbizu   Santa Maria eliza
    San Joan Bataiatzailea ermita
Arruazu   Jasokundearen eliza
    San Pedro ermita
Bakaiku   San Joan Batailatzailea eliza
    Santiago ermita
    San Benito ermita
Ergoiena Lizarraga San Klemente eliza
  Lizarraga San Migel ermita
  Lizarraga San Martin ermita
  Lizarraga San Donato ermita
  Lizarraga San Adrian ermita
  Dorrao Jasokundearen eliza
  Unanu San Pedro eliza
    San Andres ermita
Etxarri Aranatz   Santa Maria eliza
    Kontzepzio ermita
    San Gregorio ermita
Irañeta   San Joan Bataiatzailea eliza
    San Pedro ermita
    San Migel Berri ermita
Irurtzun   San Martin eliza
Iturmendi   San Migel eliza
    Aritzaga ermita
    Pilarekoa ermita
    San Pedro ermita
Lakuntza   San Salbador eliza
    San Sebastian ermita
    San Antonio Abadea ermita
Olatzagutia   San Migel eliza
    San Sebastian ermita
Uharte Arakil   San Joan Bataiatzailea eliza
    Zamartzeko ermita
    Etxebizitza Zamartzealdean
    Etxebizitza Zamartzealdean
    Santa Luzia ermita
    San Bartolome ermita
    San Bizente ermita
    San Donato ermita
Urdiain   Jasokundearen eliza
    San Pedro ermita
    San Joan ermita
    Aitziber ermita
Ziordia   Jasokundearen eliza
    Milagro ermita
Erlazionatuak

Artzapezpikutzak 66 ondasun bere izenean erregistratu ditu

Sakana

Hala jakinarazi du Nafarroako Ondarearen Aldeko Plataformak.