Nafarroako Odol eta Ehun Bankuak (NOEB) dei egin die herritarrei dohaintzak egiteko, erreserbak uda baino lehen handitu ahal izateko, ospitaletako eskaerak gora egin baitu. Oraingo honetan, A+ eta O+ taldeetako emaileei dei berezia egin zaie odola ematera joan daitezen, aurretik hitzordua eskatuz. Horretarako, Nafarroako Odol Emaileen Elkartearen, Adonaren, www.adona.es webgunean sartu daitezke emaileak. Iruñean odola eman nahi dutenek 848 422 500 telefonora hots egin behar dute, han aferesia egin nahi dutenek 848 422 560 zenbakia markatu beharko dute eta herriz herri dabilen unitate mugikorrean odola eman nahi dutenek, azkenik, 848 420 573.
Herriz herri ibiltzen den autohemoteka maiatzean ez da Sakanara etorriko. Hurrengo hilabetean bitan etorriko da ibarrera: garagarrilaren 9an, asteazkenean, Uharte Arakilen egonen da 17:00etatik 20:30era; garagarrilaren 10ean, ostegunean, Irurtzunen 16:45etik 20:30era.
Aholkuak
NOEBetik gogorarazi dute, odola emateko, ezinbestekoa dela osasuntsu egotea, sukarrik edo katarro-sintomarik ez izatea (eztul lehorra, mukiak, eztarriko mina, arnasteko zailtasuna, dastamena edo usaimena galtzea, beherakoa) eta azken 15 egunetan halakorik izan ez izana, eta azken 28 egunetan COVID paziente positiboekin edo susmagarriekin kontaktuan egon ez izana. COVID-19a arin edo sintomarik gabe igaro bada, berriz eman ahal izateko 15 egun igaro beharko dira PCR negatiboa izan eta gero, edo hilabete alta medikoa jaso edo sintomak desagertu direnetik.
Gainera, komeni da norberaren zaintzarako eta higienerako ohiko prebentzio-neurriak zorroztea (eskuen higienea, pertsonen arteko distantzia, maskara nahitaez erabili behar izatea); etxetik irten aurretik tenperatura hartzea eta 37º edo gehiagorekin ez joatea dohaintzan ematera; dohaintzan emanen ez duten laguntzailerik gabe joatea; eta alkoholik ez duten likidoak ondo hidratatzea eta edatea, bai eman aurretik, bai eman ondoren.
COVID-19ren aurkako txertoak ez du donazioa kontraindikatzen; txertoa hartu eta astebetera itxarotea gomendatzen da, odola ematera joan aurretik.
Deia dohaintzara joateko zitazioa jasotzen ari diren ohiko emaileei zuzentzen zaie, bai eta azken bi hilabeteetan dohaintzarik eman ez duten pertsonei ere, betiere urtean 4 dohaintza baino gehiago egiten ez badira gizonezkoetan eta 3 baino gehiago emakumezkoetan (tarteak jartzeko, 3 eta 4 hilabete baino lehen ematea gomendatzen da, hurrenez hurren).
Odol-premiak hematien kontzentratuetan eta 42 eta 7 eguneko iraungitze-aldiak dituzten plaketa-unitateetan zentratzen dira, hurrenez hurren. Hori dela eta, beharrezkoa da emaileen jario etengabea eta jarraitua izatea eta, ahal den neurrian, emaileen joan-etorri bakarra saihestea, odol-iraungitzeak areagotu ez daitezen.
Ordutegiak
Iruñean, Odol Bankua astelehenetik ostegunera dago irekita, 08:00etatik 20:00etara, eta ostiraletan 08:00etatik 14:30era. Dohaintzak egiteko moduari, ordutegiei, hurrengo egunetarako unitate mugikorraren ibilbideari eta abarri buruzko informazio gehiago nahi izanez gero, Adonaren web orria kontsulta daiteke.