Txingurriye laguntza eta aisialdi taldea

Arroz Mundiala!!!

Txingurriye laguntza eta aisialdi taldea 2017-11-17 21:00 Azaroaren 26an, Lakuntzan, Arroz Mundiala dastatzeko aukera izango dugu. Txingurriye Elkartearen ekimen berria dugu, munduko arrozen erara, hango eta hemengo zaporeak uztartuz. Ikasturteari hasiera emateko beta eskeintzen digun aitzaki honek hango eta hemengo kulturak bistan jartzeko balio izango digu, baita parte hartzea areagotzeko eta herritarren arteko integrazioa indartzeko ere. Elkarren ondoan egon beharrean elkarrekin egon nahi dugu eta arrozak sukaldatzeak hori egiteko beta emango dugu. Arroza mundu guztian ezaguna den jakia izanik, bakoitzak bere erara egiteko aproposa iruditzen zaigu. Bakoitzak bere puntua emango dio eta besteengandik ikasteaz gain, zapore desberdinak dastatzeko aukera izango dugu. Nahi duenak parte hartu dezake arroz dastaketa honetan, txartelak 3 eurotan salgai daudelarik. Arrozak eta edaria izango dugu salneurri horretan, eta gainerakoak, etxetik eramango ditugu, postreak e.a. Bazkal ondoren TXINGUKOLORE ekimenaren beste edizio bat izango da, herriko umeek elkarrekin jolas dezaten eta kulturaniztasuna bizitzeko beta izan dezaten. Baduzue azaroko igande bat alaitzeko modu hoberik?

Txingurriye laguntza eta aisialdi taldea 2016-05-24 08:15

Oso giro polita eta elkartasuna bizi izan ziren, erreportaiak adierazten duen bezala. Primeran!

Erantzuna | Lakuntzako Cava festa

Gora ezkonberriak! helduendako antzerkia

Txingurriye laguntza eta aisialdi taldea 2016-04-26 23:39 Datorren maiatzaren 7an Txingurriye taldekideok helduendako antzerki labur bat aurkeztuko dugu Lakuntzako Kultur Etxean. Azken urteotan hasitako ekimenen artean, taldeko kideek ongi pasatu eta hobeto ezagutzeko ekitaldia da hau. Badaramazkigu hilabete batzuk testua prestatzen, pertsonaiak egokitzen eta gure paperak entsegatzen 21 inguru antzezlek. Egia esan, elkarlanean ateratako ekintza honen helburua, beti bezala, jatorri desberdinetako jendea harremanatzea da. Tokiaren ezaugarriak direla eta, gure lana hobeto ikusi eta entzun ahal izateko, bi txandatan emango dugu antzezlana, 18:30 eta 19:30etan. Sarrera txiki bat izango da, 2 eurokoa, eta txartelak ohiko tokietan erosi ahal izango dira aurretiaz. Behar ez den zaratarik egon ez dadin, umeak sartzen badira, bere sarrera eta aulkia izan beharko dute, eta beti ere, guraso baten ondoan, baina jakinaren gainean izan, ez dela umeendako ikuskizuna eta hauek asper daitezkela.

TXINGURRIYEk II. Topaketa Gastronomikoak antolatu

Txingurriye laguntza eta aisialdi taldea 2015-11-03 23:15

TXINGURRIYEk II. Topaketa Gastronomikoak antolatu ditu Lakuntzan. Hurrengo igande arratsaldetan, azaroak 8, 22, 29 eta abenduaren 13an aukera bikaina izango dugu denok elkartzeko sutondoan. Jakiak aitzaki gisa hartuta, egoera arruntetan elkartzen ez garen jendea bilduko gara Topaketa Gastronomikoak direla medio. Orain dela bi urte egin ziren lehenengo aldiz eta arrakasta handia izan zuten. Hori dela eta, oraingoan formula errepikatzea pentsatu dugu. Egun bakoitzean, arratsaldeko 6:30 etan hasita, Lakuntzako Pertza elkartean, herrialde bateko jakiak egingo dituzte bertakoek eta besteok ikasteaz gain, dastatzeko aukera izango dugu. Igande honetan Maroko, hurrengo batean Euskal Herria, ondoren Hego Amerika eta azkena, Senegal izango dugu hizpide. Ekintza doahinik den arren, nahitaezkoa da izena ematea jakiteko zenbatendako jana prestatu. Horretarako webgune honetan menuak kontsultatu eta inskripzioak egin daitezke: http://goo.gl/t8yE0J . Lau egunetan egingo dugun baina bakoitzak aukeratu dezake noiz parte hartu. Hogeina inguru pertsonek emana dute izena jada. Oraindik garaiz zaude zuk eman nahi baduzu ere!