Santa Ageda egun handia da gaur Altsasun. Aurtengo 44 kintoek goizean goiz jarri dute hitzordua, eskean hasteko. "Kintoendako txinta batzuk..." hori da gaurko eskaria Altsasuko kale guztietan barna. Bestalde, goizeko 9:30ean Altsasuko udaletxearen aurrean jarri dute hitzordua aurtengo kintoen errege eta erreginek. Aitor Lizarraga da erregea, Beñat Iglesias erregeordea, Maialen Misiego erregina eta Ainhoa Santano erreginordea. Bertan hasi dituzte kinto guztiek, neskek eta mutilek, prestatutako opilak jasotzeko lanak. Ondoren, txistulariei jarraiki, jota eta porrusalda dantzatu dute.
Kintoen alboan astoa zegoen. Astoak daramatzan zakutoetan husten dituzte kintoek eskean jasotako diru guztia. Astoaren ondoan ere Sabin Aramendia zegoen, aurtengo boteroa, zahatoa eramateko lanak eginen dituena.
Hasi dira igandera bitartean luzatuko diren Santa Agedako festak. Gaurkoan ere zilarrezko, urrezko eta platinozko ezteiak ospatzen dituzten kintadak bilduko dira bazkaltzera.
Arratsaldean zortzikoa dantzatzeko txanda iritsiko da. Kinto eta kinta guztiek dantzatuko dute.
